सर्लाही जिल्लाभरका १७ वटा विद्यालयहरूको सहभागितासहित १७औँ स्वर्गीय टिका प्रसाद पोख्रेल स्मृति रनिङ शिल्ड फुटबल प्रतियोगिता २०८२ आजदेखि औपचारिक रूपमा सुरु भएको छ। २०८२ साल फागुन १२ गतेदेखि १७ गतेसम्म सञ्चालन हुने उक्त प्रतियोगिताको उद्घाटन समारोह भव्य रूपमा सम्पन्न भयो। कार्यक्रमका प्रमुख अतिथि हरिवन नगरपालिकाका नगरप्रमुख रमेश बुढाथोकी रहनु भएको थियो भने विशिष्ट अतिथिका रूपमा उपप्रमुख हरिमाया घलान को गरिमामय उपस्थिति रहेको थियो।

विद्यालयका संस्थापक ज्ञान प्रसाद पोख्रेलज्यूका बुवा स्वर्गीय टिका प्रसाद पोख्रेलज्यूको स्मृतिमा आयोजना गरिएको यस प्रतियोगिताले विद्यार्थीहरूमा खेलकुदप्रतिको रुचि, अनुशासन, नेतृत्व क्षमता तथा आपसी सद्भाव अभिवृद्धि गर्ने लक्ष्य राखेको छ। जिल्लाभरका विद्यालयहरूबीच मैत्रीपूर्ण प्रतिस्पर्धामार्फत खेल प्रतिभाको पहिचान र प्रोत्साहन गर्ने उद्देश्यले कार्यक्रम सञ्चालन गरिएको आयोजकले जनाएको छ।
उक्त प्रतियोगिताको आयोजना सनराइज इङ्लिस बोर्डिङ स्कुल ले गरेको हो। प्रतियोगिताको फाइनल खेल २०८२ साल फागुन १७ गते सम्पन्न हुने तय गरिएको छ। प्रतियोगितालाई सभ्य, अनुशासित तथा प्रतिस्पर्धात्मक रूपमा सफल बनाउन सबै सरोकारवालासँग सहयोगको अपेक्षा गरिएको छ।